Vendedor Merkadu Suai La Satisfas ho Ekipa Konjunta Bandu Fa’an Sasan Hateke ba Estrada no Konsidera Autoridade Covalima Fo Oportunidade ba Xineza halo Negosiu
Tanba ne’e vendedor sira iha merkadu Suai-Debos lamenta ho atusaun ne'ebé ekipa konjuta halo ba sira.
Liu husi Porta Voz Ortençio Gomes Vendedor sira hato’o lamentasaun iha konfrensia imprensa tersa ohin iha merkadu debos dehan;
“1. Ami Vendedor Merkadu Suai Covalima sira hotu la satisfas husi dirasaun Comercio tutela ba iha Administrasaun Munisipiu Cavalima nia tanba suspende aktividade ou hapara ami Vendedor nia aktividade atu la bele fa’an sasan iha ami nia kios Merkadu Suai Covalima, 2. Husu ba Nai Administrador Munisipiu de Covalima atu bele tau matan no bele hare rasik ami nia kondisaun hanesan ami Vendedor Merkadu Suai nian. tanba agora dadauk ami labele fa’an iha ami idak-idak nia kios Merkadu Suai Covalima, 3. Husi ami Vendedor sira hotu halerik tebe-tebes tanba ami labele fa’an ami nia sasan iha ami nia kios iha Merkadu suai tanba autoridade PNTL Munisipiu Covalima no dirasaun Komersiu tutela ba iha Administrasaun Munisipiu Covalima nian maka duni no taka rasik ami nia kios iha Merkadu Suai.” Porta Voz Vendedor Merkadu Suai Debos Ortençio Gomes deklara.
Porta Voz Ortençio Gomes Fundamenta hodi husi ba PNTL atu fo siguransa iha merkadu, la’os atu duni vendedor hodi la fa’an iha sira keoske tanba vendedor sira fila liman iha merkadu hetan osan hodi sustenta moris lor loron no selu oan sira eskola.
“4. Husu ba PNTL Munisipiu de Covaiima la’os atu duni ami no ami la bele fa'an ami nia sasan iha ami nia kios iha merkadu Suai, maibe tuir lolos PNTL Munisipiu Covalima atu fo seguransa la’os atu duni ami hodi ami labele fa'an ami nia sasan iha ami nia kios iha merkadu Suai, 5. husi ami vendedor sira hodi ami nia fa'an sira ne’e maka sustenta ami ida-idak nia oan hodi haruka ba eskola, maibe agora daudauk ne’e ami labele fa’an ami nia sasan iha kios merkadu Suai, Covalima nian, oinsa ami bele sustenta ami ida-idak nia oan hodi fo eskola.” tenik Porta Voz Vendedor Merkadu Suai Debos Ortençio Gomes,
“6. Husu ba PNTL Munisipiu Covalima no Administrador Munisipiu Covalima Wainhira taka ami nia aktividade hanesan vendedor iha Merkadu Suai, Covalima ami vendedor hotu-hotu husu mos ba Administrador Munisipiu Covalima no Komandante PNTL Covalima bele taka hotu aktividade jogu Kasino ne'ebé loke iha salaun uma Feto Covalima ou Gedung Wanitan nian no Bola Guling sira maka loke iha Suai Covalima nia laran tanba eduka joven sira ba dalan problema sosial no krime Furtu bele mosu iha Suai, Covalima nia laran.” deklara Ortençio Gomes
Nune’e mos Vendedor sira iha Merkadu suai debos husu atu hapara mos atividade negosio husi Xineza sira iha merkadu suai debos.
“7. Wainhira ami Vendecor Timor oan la bele fa'an ami nia sasan iha Merkadu Suai, husu mos ba dirasaun comersial no nai Administrador MunisipiuCovalima atu taka total Chinesa sira ne'ebé maka loke sira nia loza iha merkadu Suai nia fatin, 8. Husi ami Vendedor sira hotu iha Merkadu Suai, Covalima nian la satisfas hosi hahalok ne'ebé maka maltrata husi dirasaun Comersial tutela ba iha administrasaun Munisipiu Covalima nian no ba PNTL Municipiu Covalima duni no ami labele fa’an ami nia sasan iha ami nia kios Merkadu Sual Covalima nian.” Ortençio Gomes Saleinta.
Vendedor siro mos deklara selu taxa ba estuda kada fulan no tinan maibe tanba mak ekipa konjunta tenki hapara sira nia atividade negosio.
“9. Ami Vendeder iha Merkadu Suai, Covalima mos kada fulan selu tasa ba estadu maibe to’o ikus taka ami nia atividade negosiu.” Porta Voz Ortençio Gomes hakotuk.
Hatan ba lametasaun husi vendedor sira ne’e, Diretor Servisu Munisipal Jestaun Merkadu no Turismu, Vitorino do Carmo, dehan kuandu merkadu ida ne'ebé hamrik ho nia jestaun rasik atu bele akumula ema hotu hodi bele hetan hotu rendimentu tan ne’e maka ekipa halo jestaun la’os fo oportunidade ba ema estranjeiru ka Xineza sira.
“Merkadu ida ne'ebé mak hamrik ho ninia jestaun rasik, merkadu ne’e nia atu akumula ema barak ne'ebé atu utiliza hetan rendimentu hanesan, tanba ne’e mak ami halo jestaun, ami halo jestaun la’os fo oportunidade ba ema Xineza, halo jestaun atu ema sira ne'ebé utiliza merkadu propriedade estadu atu sira hetan hotu rendimentu ne'ebé maka hanesan, durante ne’e jestaun mos ladun di’ak maka ema sira iha laran ne’e la hetan rendimentu tanba ema sira ne’e iha estrada ibun ne’e sira na’in rasik loke odamatan ba iha estrada, maibe merkadu nia orijinal odamatan ba iha estrada laiha” nia dehan.
Vitorino mos haktuir, razaun autoridade iha Covalima foti desizaun hodi haruka venedor sira labele loke odamatan hateke ba estrada nune’e bele fo oportunidade ba vendedor sira seluk mak fa’an iha merkadu laran bele hetan mos rendimentu, iklui labele halo engravamentu iha estrada.
“Sim ida ne’e maka ami halo tanba uluk kios sira ne'ebé mai iha estrada ne’e ninia odamatan laiha, kuartu sira ne’e ninia ukuran 3x3 agora sira loke mai halo to’o iha estrada ninin depois odamatan mos sira na’in halo rasik mai fali estrada, tanba ne’e ami la’os taka sira nia atividade negosiu, maibe ami halo sira taka odamatan mai estrada para ema iha merkadu laran ne’e bele hetan rendimentu no sira labele fo engravamentu iha estrada” nia dehan.
Engkuantu tuir vendedores sira autoridade iha Covalima atu fo oportunidade Xineza sira maka bele fa’an sasan iha estrada ninin hodi hamate atividades negosiu povu ki’ik sira nian iha merkadu Suai Debos.
Jornalista : Julio Salinas/Balta Monis
Editor : Chamot Nahac
