COVALIMA---Kordenadora Ekipa Lao Hamutuk, Marta da Silva, tuir Lao Hamutuk nia haree durante ne'e kazu Korupsaun iha Timor-Leste sei kontinua as tanba husu entidade hotu tenke tau atensaun maka'as hodi redus.
"Uluk ita iha lei ba harii Komisaun Anti Korupsaun (KAK) maibe ita laiha lei ba Korupsaun maibe iha tinan rua ka tolu liu ba ne'e foin iha lei ne'ebe ema bolu dehan medidas preventiva ba kombate Korupsaun, maibe haree kazu korupsaun kontinua as iha Timor-Leste tanba ne’e husu entidades hotu atu tau atensaun ba kazu Korupsaun" informa Kordenadora Ekipa Lao Hamutuk, Marta da Silva, ba jornalista sira hafoin hala'o enkontu publiku ho autoridade lokal sira iha Munisipiu Covalima ne'ebe hala'o iha Salaun Igreja Ave Maria Suai Kinta (12/05).
Nia haktuir lei iha ona oinsa funsaun KAK nudar nain atu implementa lei maibe hatene katak laos sira mesak maibe ema hotu tenke fo kontribui, no oinsa sira bele halo ativu diak liu tan prosesu hirak ne’e para ema hotu iha konsiderasaun hodi kombate korupsaun.
Nia afirma iha parte ida mos KAK laos nain ba kazu, nain ba kazu maske lei foun nain ba kazu ne'e mak Ministériu Publiku, dala ruma KAK lori kazu korupsaun sira to'o iha ne'eba mak lakohi kontinua flow up kazu ne'e bele mate deit.
Tanba ne’e KAK tenke iha rekirsu umanu adekuadu hodi eleva sira nia servisu ne'ebe diak hodi garantia katak ho kontribuisaun ema hotu nian bele kombate tanba agora maske iha lei mos numeru korupsaun ne'e kontinua sae iha mundu inklui Timor-Leste.
Lao Hamutuk sujere ba govenu liliu ba instituisaun relevante sira katak kuandu ema ruma halo korupsaun tenke fo sansaum ne'ebe todan, tanba bainhira nia hetan ona sansaum ne'ebe todan nia atu naok fali mos tauk ona maibe kuandu ho medidas ne'ebe mamar maka nia sei kontinua naok nafatin osan povu nian.
Marta dehan bazeia ba relatoriu ne'ebe Lao Hamutuk asesu hatudu katak kazu korupsaun iha tinan 2020-2021 partisipasaun ba kazu Korupsaun menus.(Azu)
