COVALIMA----Durante ne’e Serbisu Guarda Floresta Munisipiu Covalima sei kontinua halerik ba iha transporte no ekipamentu Seguransa pesoal nian liliu hanesan stik no gas lakre muzenho (gas air mata) atu utiliza hala'o serbisu iha terenu.
"Ami nia preokupasaun durante ne'e hasoru liliu ba iha transporte, mina inklui material Seguransa nian ba guarda floresta nian hodi hala'o serbisu iha terenu" Lia hirak ne'e hato'o husi Membru Corpo Guarda Floresta Munisipiu Covalima Joselino do Carmo, ba jornalista sira iha nia knar fatin Munisipiu Covalima Kinta (01/06).
Nia dehan guarda floresta nia serbisu tun ba iha terenu hodi impede ema hotu nia hakarak, liliu ba ema ne'ebe hakarak koa ai ka tesi ai no sunu rai ne'e bainhira guarda hetan sempre ba hapara, maibe guarda floresta nia serbisu ida ne'e tun ba ho liman mamuk.
Dala barak tun ba iha terenu hasoru komunidade sira mai ko'alia Balu ho respeitu Balu mai ko'alia ho Lia fuan maka'as, lia fuan ne'ebe la meresa atu ko'alia sai mos sira ko'alia hotu.
"Tanba ida ne'e maka Ami hakarak husi ba governu foun mai ne'e se deit mak sae ba kaer ukun ami nia hakarak ne'e tenke hetan fasilidade ida ne'ebe hodi fo seguransa mai ami, maizumenus laos kilat mos hanesan stik gas lakre muzenho (gas air mata) Ida ne'e ami guarda floresta presija tebes" nia informa.
Joselino husu governu tau atensaun liliu ba iha transporte tanba agora daudaun guarda hotu iha Covalima hala'o serbisu uza transporte privadu hodi bele ba iha foho halo kontrolu ba alas tuan tuan sira para ema labele naran koa ai arbiru seim iha lisensa husi floresta.
Nia dehan ho difikuldade sira ne'e hato'o beibeik ona maibe ukun nain sira la tau matan la responda ba preokupasaun hirak ne'ebe guarda floresta iha Covalima hasoru.
Joselino dehan transporte maka sai importante tebes atu bele hodi asegura rekursu florestais sira liliu iha Munisipiu Covalima.
Hatan ba preokupasaun guarda floresta Munisipiu Covalima nia halerik ba transporte no ekipamentu seguransa nian tuir Xefe Unidade Lisensamentu Floresta Nasional, Aplinario Freitas, hatete floresta hahu husi 2004 to'o 2022 foin maka purvota ema na’in-300, maibe hare ba area Timor-Leste luan tebes sira labele kobre hotu ba area ne'ebe luan, fasilidade ne'ebe sira iha ne’e limitadu tebes no menus liu liliu ba ekipamentu seguransa pesoal nian ne’e laiha liu.
“Iha oporrunidade diak ida ne'e hakarak atu informa ba publiku liliu ba governu katak floresta hahu iha tinan2004-2022 foin maka purvolta ema na’in-300 guarda floresta, area Timor-Leste ne'e luan tebes sira labele kobre hotu ba area ne'ebe luan, fasilidade ne'ebe sira iha ne’e limitadu tebes, menus liu, para mais seguransa pesoal nian ne’e sira laiha, sira hala'o knar ne'e defisil liu duke polisia sira nian” nia afirma.
Nia salienta sira nia serbisu polisiamentu bainhira ba halo atuasaun iha terenu ho liman mamuk ho konesimentu ne’ebe limitadu maibe sira ho fuan boot sira ba tanba hakarak asegura rekursu timor laran nian tomak, ho ida ne’e husu komunidade hotu-hotu atu sai nain nudar guarda atu bele apoiu guarda floresta hodi asegura rikusoin sira ne’e hotu.
Tanba sira fasilidade hotu-hotu laiha motorizada mos menus, mina buat hotu-hotu menus hotu kedas, tan ne’e hakarak husu ba governu tenke tau atensaun hodi apoiu transporte ba guarda sira, tuir fali bele apoiu ekipamentu kona-ba seguransa pesoal nian hanesan gas no stik sira ida ne’e maka importante ba guarda sira hala’o serbisu iha terenu.
Nia dehan guarda sira mos presija tebes liliu ba iha fasilidade seguransa pesoal nian tanba bainhira sira tun ba iha terenu dala ruma hasoru ema bele tuda sira iha ai laran no balu bele halo akresaun fiziku ba guarda floresta maibe sira pasiensia kontinua hodi asegura buat sira ne’e ho diak tanba komunidade laos inimigu ba iha floresta, maibe sai hanesan parseiru utiliza maneira, utiliza rekursu floresta ninian.(azu)
