Covalima (RCCT) 30-10-23--Relasiona ho eleisaun orgaun suku ne'ebé foin lalais monu iha loron 28 fulan Outobru tinan ne’e iha Munisipiu Covalima rezultadu hatudu kandidatura feto na’in tolu hakat ba segundu ronde.
Diretór Sekretariadu Tekniku Administrasaun Eleitoral (STAE) Munisipiu Covalima Francisco Gusmão hatete, iha eleisaun orgaun suku foin lalais ne’e kandidatura sira ne'ebé hakat ba iha segundu volta hamutuk ema na’in-49, kompostu husi mane na’in-46 no feto na’in-3, ne'ebé mai husi Suku Maudemo atual xefe suku Maria Fatima, kandidatura Suku Beiseuk Domingas de Jesus no kandidatura husi Suku Fatululik Miranda Rita.
“Eleisaun foin daudauk liu ba ita nia kandidatura ne'ebé avansa ba iha segundu volta tuir jeneru ne’eba mak iha mane iha 46 no feto iha na’in 3, feto na’in tolu ne’e mai husi Suku Beiseuk feto ida, Maudemo xefe atual Maria Fatima no Fatululik feto ida” informa Diretór Sekretariadu Tekniku Administrasaun Eleitoral Munisipiu Covalima Francisco Gusmão, ba jornalista RCCT iha nia knar fatin Segunda ne’e.
Diretór STAE Covalima seidauk bele fo sain feto nain hira mak eleita ba Xefe Aldeia no Delegada tanba parte STAE seidauk simu relatoriu husi Pesoal Sekretariadu Tekniku Administrasaun Eleitoral Apoiu Suku no Aldeia.
“Eleisaun orgaun suku ba lideransa komunitaria nian ne'ebé maka ita halo, xefe aldeia, delegada no delegado ne'ebé eleitu ate agora ita sei iha informasaun konaba ida ne’e tanba sei iha prosesu rekolla dadus, tanba ne’e ita foin atu husu PSAS no PSAA sira nune’e hodi afirma ba STAE munisipiu, tan ne’e seidauk iha dadus fiksu konaba feto hira maka eleita ba aldeia no eleita ba delagada” nia dehan.
Entertantu iha Munisipiu Covalima feto ne'ebé kandidata ba suku hodi kompete ho mane sira iha eleisaun orgaun suku ba periudu 2023-2030 hamutuk ema na’in-16 mak hanesan Natalia A de Jesus husi Suku Taroman, Suku Lour Domingas Corte Real, Suku Kasabauk Remigia A. B. Tilman, Agustina A. Liuk no Maria Fatima husi Suku Maudemo, Natalia Amaral husi Suku Nanu, Umbelina S. Amaral husi suku Fohorem, Domingas de Jesus,husi Suku Beiseuk Cariana Elsa Barreto, Suku Matai, Ana Maria Pereirra, suku kamenasa, Olinda do Carmo, Suku Holpilat, Santina de Jesus Suku Suia Loro, Maria Fienelda no Felizarda M. da Costa, husi Suku Lalawa, Mindarita Alfrida de Jesus husi Postu Administrativu Fatululik Suku Taroman.
Jornalista : Julio Salinas
Editor : Chamot Nahac
