KO25 HO APA SUAI REALIZA DIALOGU KOMUNITARIA NO HALO REFLESAUN HO ESTUDANTE SIRA HODI KOMEMORA 30 DE AGUSTO

Covalima (RCCT) 28-08-24-Komite Orientador 25 hamutuk ho Administrador Postu Administrativu Suai, realiza atividade dialogu komunitaria no halo reflesaun hodi hanoin hikas istoria moruk sira ne’ebé liu ona molok hetan ukun rasik. Atividade ne’e realiza hodi komemora loron konsultasaun popular (30 de Agusto 1999-2024) ona ba dala XXV.

Administrador Postu Administrativu Suai, Ildefonso Maria Amaral, konsidera estudante hanesan jerasaun foun ne’ebéé presija iha komprensaun  di’ak konaba istoria Timor-Leste.

“Hanesan jerasaun foun atu bele rona istoria ruma husi ita nia aman veteranus sira konta ona istoria ba ita hotu, atu nune’e ita bele intende no komprende didi’ak ita nia istoria no ita mos atu hanoin hikas fali ita nia eroi sira ne’ebé sakrifisiu ba rai doben ida ne’e hahu husi 1975 to’o 30 de agusto loron konsulta popular ida ne’e” dehan APA Suai ba jornalista sira iha Salaun enkontru Administrasaun Postu Administrativu Suai Kuarta (27/08).

Bendito Xavier, hatete Komite Orientador 25, hetan Apoiu husi Gvernu liu Ministeriu Administrasaun Estatal hodi haklaken istoria Timor-Leste ba jerasaun foun sira liliu ba estudante sira atu hatene klean liu tan konaba istoria pasadu luta na’in sira nian.

“Ami hakat mai iha ne’e husi Komite Orientador 25 ami apoiu no la’o tuir ministeriu estatal nian maka hakat mai iha ne’e no mos istoria ida ne’ebé maka foin daudauk hau nia maun alin balu ko’alia tiha ona, istoria balu ami hakerek ona iha ami nia sede no aban bainrua ami sei fahe ba estudante sira tuir nivel eskola hanesan ho lian Indonezia nian katak SD, SMP no SMA to’o iha universidade, liu husi atividade reflesaun ne’e oinsa atu fo hanoin ba estudante sira hanesan jerasaun foun tenke hatene klean liu tan ba istoria Timor-Leste, hanesan ema matenek na’in sira ko’alia katak istoria forsa nasaun forsa” dehan Membru KO25, Bendito Xavier

Entertantu atividade ne’e realiza ho tema “Hakerek Livru Istoria Rezistensia Organizassaun Juvenil no Estudantil ba Libertasaun Nasional, no partisipa iha dialogu komunitaria no reflesaun ne’e mai husi Komite Orientador 25, Administrador Postu Administrativu Suai, xefe sira, xefe aldeia sira, delegada no delegadu inklui estudante sira husi Eskola Sekundaria Jeral Publiku (ESGP-Sigla Portuguesa) Suai, Eskola Sekundaria Katolika Ave Maria Suai, no Eskola Teniku Vokasional Akara Laran..

Jornalista : Julio Salinas

Editor      : Chamot Nahac