Xefe Departamentu Asistensia
Sosial Munisipiu Covalima, Filomena Alves Barros, hatete objetivu husi enkontru
ida ne'e atu halore informasaun ba malu konaba kazu ne'ebé Rede Referal sira
rekolla no halo atendimentu ba vitima sira iha terenu.
"Enkontru ida ne’e
realiza husi Ministeriu Solidariedade Sosial no Inkluzaun liu husi Servisu
Centru Solidariedade Sosial Munisipiu Covalima trasa planu kada trimestral halo
enkontru, tanba ne’e objetivu husi enkontru ida ne’e oinsa ita hato’o informasaun
ba malu kona ba atendimentu kazu ida ne'ebe durante ne'e rede Referal sira
hala'o hodi nune’e ita trasa planu hamutuk, planu ba oin halo nusa no update
mos informasaun kona ba kazu hira maka durante ne'e membru rede sira hasoru no
halo atendimentu" informa
Xefe Departamentu Asistensia Sosial Munisipiu Covalima, Filomena Alves
Barros.
Counselor Uma Transit Suai,
Antonia de Jesus, hatete iha sorumutu ne’e mos atu hadi'a liña kordenasaun no
sevisu hamutuk hodi tau matan ba feto sira bele hetan no asesu ba justisa ida
ne'ebé justu.
"MSSI maka sai mahon
ba rede Referal no ita sira membru rede maka hanesan Uma Mahon Salele, Pradet,
Fokupers, Alfela, lider komunitaria sira, Centru Comunidade Covalima, hirak
ne'ebé ita halo atendimentu ba kazu sira hanesan violensia bazeia ba Jéneru, Insestu
no liliu ba kazu sira ne'ebé relevante ba feto sira, tan ne’e objetivu husi
enkontru ida ne’e atu hadi'a liña kordenasaun, atu hadi'a servisu parseiru sira
oinsa parseiru sira atu lolo liman ba malu, kolabora hamutuk hodi suporta ita
nia maluk feto sira ne’e atu hetan justisa ne'ebé justu, atu hetan mos
akonsolamentu di'ak, apropriadu bele iha forsa hodi sustenta ninia familia
rasik liliu ba kazu sira ne'ebé abandona katak dala balu maluk mane sira husik
hela oan ka tau hela oan ba sira no sira la’o ses tiha, kazu abandona ne’e maka
sai preokupasaun rede Referal ninian oinsa atu tulun sira nune’e sira bele sai
forte" nia dehan.
Enkontru Rede Referal nia
Prioridade no importante atu atinje kualidade servisu ne’ebé di'ak husi membru
Rede Referal maka presija sukat kbi'it liu husi enkontru, tan ne'e Centru
Solidariedade Sosial Munisipiu Covalima iha trimestral III tinan 2024, halo
avaliasaun ba progresu servisu no obstaklu sira ne'ebé durante Rede sira
infrenta.
Entretantu Partisipa iha enkontru
ne'e mai husi membru Referal sira hanesan uma Mahon Salele, Polisia VPU,
Ministeriu Publiku, Alfela, Pradet, Fokupers, Servisu Munisipal Edukasaun
Covalima, Servisu Saude, SEI, ONG Belun, Rejistu no Notariadu, Centru
Comunidade Covalima, RHTO, KDSTO, no seluk tan.
Jornalista : Julio Salinas
Editor :
Chamot Nahac
