DANIEL-DEZENVOLVIMENTU IHA TILOMAR KOMESA LA’O DI'AK, MAIBE UKUN NA'IN SIRA PRESIJA FO LIMAN BA MALU
Daniel dehan hanesan sidadaun
Timor oan husi Postu Administrativu Tilomar husu ba ukun na’in liu lliu ba
autoridade sira iha Covalima atu fo liman hodi dudu dezenvolvimentu hahu husi
kapital munisipiu to’o suku no aldeia.
“Tuir ha’u nia observasaun ba ita nia
dezenvolvimentu iha rai Tilomar liliu iha suku no aldeia sira iha ona mudansa
ba buat balu, maibe dezenvolvimentu atu la’o di'ak liu, nai ulun sira jerasaun
ba jerasaun presija fo liman ba malu, tau hanoin hamutuk oinsa bele kria
unidade hodi dezenvolve ita nia rai ida ne’e liliu rai Tilomar, hare konaba
infrastrutura baziku hanesan estrada nia kondisaun seidauk di’ak, maibe sujera
ba governu atu bele tau atensaun hodi bele tau planu nune’e tinan oin bele
hadi'a,” dehan Daniel.
“Biban ida ne’e hakarak rekomenda ba
governu atu bele tau konsiensia hodi hadi'a dezenvolvimentu iha rai doben
Timor-Leste espesial rai Tilomar, hare konaba dezenvolvimentu liliu iha area
edukasaun, maske iha eskola balu sei kontinua halerik ba iha kadeira ho meja
maibe iha parte balu mos komesa la'o diak ona" tenik Sidadaun
Daniel.
Xefe Suku Lalawa, Jefrino de
Richman hatete dezenvolvimentu iha Lalawa la'o maibe sei neneik liu, maibe
estrada sei sai preokupasaun bo'ot ba iha komunida atu bele lori sira nia
produtu lokal asesu ba iha merkadu Suai.
"Infrastrutura iha
Lalawa lao ho orsamentu Programa Nasionál Dezenvolvimentu Suku (PNDS) neebe
hanesan estrada rural, moru protesaun ba eskola sira lao, maibe haree ba
estrada ligasaun husi Lalawa ba iha Postu Administrativu Fatumea no Fohorem
maka tinan ba tinan sei dauk iha mudansa no iha tempu udan fo impaktu ba
komunidade labele lori sira nia produtu lokal asesu ba merkadu liliu iha
Suai" nia dehan.
Tanba ne’e, Xefe suku Lalawa Jeferino
Richman husu ba governu atu bele tau planu hodi hadi'a dalan iha postu Tilomar,
tanba durante tinan barak nia laran ona maka komunidade husi postu
administrativu tolu hanesan Postu Administrativu Tilomar, liga ba iha Postu Administrativu Fohorem no
Fatumea susar tebe atu lori sira nia produtu lokal asesu ba iha merkadu Suai,
liu liu iha tempu udan bo'ot.
Jonalista : Julio Salinas
Editor : Chamot Nahac
