Tito Tilman mos nudar Xefe Grupu
Agrikultor Fini Uman, konta ninia esperensa wanhira servisu iha Kompañia
Internasional Timor Resource(TR), katak Kompañia ne’e sosa modo husi munisipiu
seluk hodi fo han trabalador sira. Ho esperensia ne’e mak motiva nia forma
grupu Fini Uma (FU) hodi halo atividade kuda no hakiak Modo hodi fa’an para hetan
osan.
“Ha’u uluk servisu iha Kompañia
Internasional Timor Resource, ne’ebé halo perfurasaun ba mina iha Covalima, iha
ne’eba ha’u mos hanesan estaf, momentu ne’eba, ha’u hare Covalima oan laiha
preparasaun, tan iha tempu ne’eba ita nia modo sira iha Covalima ne’e labele
responde kompañia nia presija, tan ne’e kompañia mos foti modo husi mos
munisipiu seluk nian lori mai, bainhira iha servisu tempu deskansa nian ha’u
tu’ur hanoin katak bainhira ha’u para husi servisu ne’e fila ba hamutuk ho inan
aman sira forma grupu agrikultor ida hodi halo to’os kuda modo, se kuandu ita
la prepara an aban bainrua ita sei sai bainaka iha ita nia munisipiu rasik,
labele hanoin deit hakarak atu servisu iha kompañia laran ka iha kantor maibe
servisu iha to’os laran mos bele halo ona kontribuisaun hodi hadi’a moris ba
futuru mai liliu fo benefisiu ba ita nia an bainhira hetan ona rendimentu
ekonomia di’ak” informa Tito Tilman.
Nia haktuir, alende hakiak pateka
no kuda modo, nia ho membru grupu sira mos dadaun ne’e instala ona kolan rua
hodi haki’ak ikan.
“Oras ne’e daudaun ha’u mos
instala ona kolam ikan rua iha ne’eba, maibe ba futuru sei kontinua halo bo’ot
tan, no planu ba oin sei haki’ak mos manu, no modo sira ne’ebé durante ne’e ami
haki’ak lubuk ida ona maka ami lori ba fa’an iha merkadu, balu fa’an ba
komunidade sira iha Suku Kamanasa ida ne’e no balu ami distribui ba iha eskola
sira liu husi programa merenda eskolar nian hodi fo han ita nia oan ka alin
sira eskola iha ne’eba” nia dehan.
Entretantu Tito Tilman hari hahu
forma grupu agrikultur Fini Uman iha tinan 2022 ho Fundus rasik hamotuk Dolar
Amerikanu Atus nen ($600.00).
Jornalista : Julio Salinas
Editor : Chamot Nahac
