GOVERNU LIU HUSI SMOPT COVALIMA FO OSAN $ 29,000.00 BA LORON NABILAN UNIP,LDA KONSTRUI ESTASIONAMENTU MOTOR NO KARETA IHA MERKADU DEBOS

Covalima (RCCT) 05-09-24-Iha tinan ne’e nonu governu liu husi Ministeriu Obras Publiku no Transporte (MOPT) aloka osan ba Munisipiu Covalima ho montante dolar amerikanu rihun rua nulu resin sia ($ 29,000.00) hodi halo jestaun ba estasionamentu motor no kareta iha Merkadu Debos, Suai.

Diretór Servisu Munisipal Oras Publika no Transporte Munisipiu Covalima, Sidonio Gusmão relata,  liu husi prosesu aprozionamentu maka Kompañia Loron Nabilan, Unipesoal. Lda maka sai manan na’in hodi implementa projetu ida ne’e.

“Prosesu normal husi prosesu aprozionamentu, depois aprozionamentu kontaktu kompañia sira halo kompetisaun no manan na’in maka ita identifika kompañia Loron Nabilan, sira maka daudaun ne’e halo hela konstrusaun ba jestaun estasionamentu iha Merkadu Suai ne’e, no jestaun estasionamentu ne’e husi programa ne’ebé sub programa ida ligadu ho transporte ne’ebé tutela direita iha servisu munisipal obras publika ne’ebé iha tinan kotuk ita tau planu ho nia total orsamentu $ 29,000.00, hanesan ita hatene estasionamentu ne’e liga ona ba iha parkiran kareta fatin, motor fatin, depois aban bainrua hotu tenki utiliza ona, transporte publiku bele utiliza tuir regras ne’ebé ita sei tau iha ne’eba” Diretór Servisu Munisipal Oras Publika no Transporte Munisipiu Covalima Sidonio Gusmão ba jornalista iha nia knar fatin Santa Rosa, Suai, Kinta (05/09).

Iha fatin Diretór Kompañia Loron Nabilan,Unip.Lda, Rude de Sousa, garantia projetu refere sei finaliza ho durasaun fulan tolu tuir data ne’ebé determina husi obras publiku.

“Ami sei esforsu,  hakarak ka lakohin projetu ne’ebé hasai liu husi ministeriu obras publika hodi fo fiar mai ami ho durasaun fulan tolu ne’e liu husi ami nia esforsu hakarak lakoi tenki finaliza duni iha tempu ne’ebé determina ona, maibe tuir planu kompañia nian ami hakarak esforsu an lais liu tan maizumenus iha fulan ida ho balu atu tama ba fulan rua ami tenke entrega ona ba obras publika, tanba projetu ida ne’e mos sai patokan ida ba ami oinsa para Obras Publika bele fo fiar liu tan mai ami kona ba servisu ida ne’ebé agora daudaun ami hala’o hela” nia hatete.

Entertantu tuir Diretór Servisu Munisipal Oras Publika no Transporte munisipiu Covalima Sidonio Gusmão dehan durasaun tempu ba kompañia Loron Nabilan Unipesoal. Lda hodi halo projetu konstrusaun estasionamentu ba motor no kareta iha Merkadu Debos, Suai durante  fulan tolu de’it, maibe bainhira iha fulan tolu nia laran la finaliza maka sei extende tan tempu ba kompañia to’o finaliza lolos maka bele entrega, maibe parte kompañia Loron Nabilan optimista no garatia atu finaliza konstrusaun refere iha fulan ida ka rua nia laran.

Jornalista : Julio Salinas

Editor      : Chamot Nahac