Komunidade na’in ba karau iha
Suku Tashilin, Raimundo da Costa, hatete povu hakiak animal atu lori sustenta
moris no fo oan ba eskola maibe ema deskuñesidu sempre uja kilat tiru mate sira
nia animal hakiak (karau) no wainira sira hetan fali karau ne’e dodok no is ona
halo sira labele ona atu aproveita.
" razaun saida maka
ami povu nia animal ne’e tiru arbiru deit, bainhira buat sira ne’e akontese
hato’o ami dadus ruma ka asuntu ruma ba leten sira dehan buka lai evidensia,
ami povu ne’e oinsa maka evidensia iha, ami ba hetan animal dodok maka iha tanba
mate ona, animal kanek maka iha no tohar maka iha no tiru kuak sira ne’e maka
iha, ami povu ne’e kilat laiha, no iha artigu hira maka bele lori kilat estraga
povu nia animal, ami lori saida maka atu bele dezenvolve rai ida ne’e no mos
bele lori saida maka hatama ami nia oan sira ba eskola, ho attitude ka hahalok ida
hanesan ne’e halo ami povu laran triste tanba kilat ne’e povu nian ikus mai
lori kasa fali ami nia animal, iha loron 7 fulan setembru 2024 akontese kalan
rona kilat lian dader ami ba hare karau
balu mai ho kanek, balu mate dodok ona tanba la hetan, mate bubu to'o dodok
ne’e iha karau baka ho karau timor (Karau metan)” dehan Raimundo ba
jornalista iha Kulu-Oan, Kinta (12/09).
"Ha’u hela iha Aldeia
Kulu-Oan, buka moris liu husi hakiak animal hanesan karau iha Aldeia Halik,
Suku Beko, Postu Administrativu Suai, ha’u nia karau ne’e marka ne’e tau numeru
hotu hahu husi numeru 01 to'o 20 maibe oras ne’e daudaun karau ne’e atu hotu
deit ona, ema sira ne’e lori kilat ba tiru iha tempu kalan loron la iha, ne'ebé
atu bukti ka evidensia husi karau na'in sira ne’e susar uitoan tanba kalan ne’e
ami mos tauk atu sai ba mai iha rai fuik ne’e, ho ida ne’e mak ami nia karau
kalan lakon hela deit balu mai ho kanek,
balu ain tohar mai ami na'in han, maibe Karau hirak ne'e la’os naran
tohar ka kanek deit maibe kanek ho tohar mai husi ema lori kilat maka tiru, ne'ebé
husu ba maluk sira ne'ebé lori kilat ne’e atu buka modo karik, modo iha merkadu
maka iha, lori osan ba sosa deit iha ne’eba, labele lori kilat mai kasa fali
povu nia karau, tanba iha Halik karau fuik laiha komunidade nia karau hakiak
maka iha” Claudino Luan dehan ba jornalista sira (12/09).
Observasaun jornalista iha terenu
komunidade nia karau ne'ebé hamotuk rua (karau Baka ida no metan ida), no mos karau
tolu mak hetan kanek tanba tiru ho kilat.
Entretantu informasaun ne'ebé
jornalista rekolla iha terenu katak kilat lian sempre tarutu iha loron sabadu
no domingu kalan, hanesan foin akontese lalais iha loron 7 no 8 fulan setembru,
iha kalan akontese kilat tarutu iha area Kulu-Oan, dadersan karau na'in sira ba
hare sira nia karau balu maka kanek no balun mate ona. Engkuantu to'o notisia
ne’e hatun jornalista seidauk halo konfirmasaun ho parte seguransa hodi hetan
informsaun konaba asunte ne’e.
Jornalista : Julio Salinas
Editor : Chamot Nahac
