Kordenador Extensionista Postu
Suai, Agustinho José, hatete formasaun ne’e importante grupu sira la’os atu
hatene deit kuda modo no pateka maibe atu hatene mos hodi halo selesaun ba fini
no oinsa atu hatene halo produsaun ba adubu organiku ben no adubu maran.
“Ohin loron ne’e ami mai fo
treinamentu ba grupu Agrikultor Fini Uman konaba ai horis ruma hanesan varidade
rua liliu oinsa kuda modo no kuda pateka, husi ai horis rua ne’e ami mai fo
formasaun mos konaba preparasaun selesaun fini, fo adubu, halo prevensaun ba
pesti no koileta to’o post koileta, formasaun ne’e ohin ami mai fo kona ba
teoria no aban maka halo pratika kona ba oinsa halo abudu been mp pomsa maka
halo abudu maran” informa Kordenador Extensionista Postu Suai,
Agustinho José, ba jornalista iha Fini Uman, Suku Kamanasa, Postu
Administrativu Suai.
Staff Tekniku ONG HLT, Armando
Soares, infroma, formasaun ne’e sei realiza durante loron rua, nune’e iha loron
dahuluk sei fasilita deit Teoria no iha loron daruak mak sei halo Pratika koanaba
oinsa atu hakiak modo no kuda pateka.
“Ohin loron ho aban ne’e
ami hahu halo formasaun ba grupu fini uman, tanba ne’e ami husi HLT maske ami
iha teknika rasik ami bele fo formasaun maibe ida ne’e ami sente hanesan labele
la’o mesak, presija la’o hamutuk ho governu, tanba ne’e ita ko’alia konaba
agrikultor nian, ne’e ministeriu agrikultura maka bele hatene, tan ne’e maka
ami halo kooperasaun ho MAPPF Covalima dirije hela sira nia delegasaun ba
formador na’in rua mai ohin loron ami hahu ho formasaun teoria no aban tama ba
iha pratika liliu ba grupu sira bele hatene k’lean liu tan karik kuda modo ka
pateka ruma maka moris kona moras meus saida maka maka bele uza hodi atende
lalais atu labele kona moras” nia nia informa.
Nune’e Xefe Grupu Agrikutot Fini
Uman, Tito Tilman, orgullu tanba durante uza deit matenek rasik hodi hala’o
atividade agrikultur, maibe liu husi oportunidade ne’ebé hetan formasaun HLT no
Ministeriu Agrikultura bele hasa’e kapasidade hodi haki’ak modo no pateka.
“Sente orgullu no kontente
tebes tanba ohin konsege hetan duni formasaun husi ita nia extensionista sira
husi MAPPF Munisipiu Covalima mos servisu hamutuk ho ONG HLT, ne’ebé apresia
tebes ho sira nia prejensa iha ne’e, ami presija duni tanba durante ami halo
atividade ida ne’e uza ami nia matenek rasik no koñesimentu uitoan ne’ebe naton
ami koko hodi mobiliza malu halo atividades ida ne’e maibe ohin loron husi
parte governu no ONG nian mai hakbi’it ami sente kontente, ba formasaun ami
presija duni tanba ami nia konesimentu ne’e naton hela, ne’e ami presija duni
ida ne’ebe maka parte governu ka ONG ruma mai hakarak nafatin apoiu ami ba iha
formasaun ami prontu simu” Tito informa.
Enkuantu formasaun ba Grupu
Agrikultor Fini Uman ne’e fasilita husi formador sira ne’ebé mai husi Ministeriu
Agrikultura Pekuaria Peska no Floresta Munisipiu Covalima no ONG HLT, formasaun
ida ne’e hala’o durante loron rua, hahu kinta to’o sexta semana ne’e. Engkuantu
iha formasaun partisipa masimu husi Administrador Postu Administrativu Suai,
Ildefonso Maria Amaral, no membru grupu Agrikultor Fini Uman hamutuk ema
na’in-15.
Jornalista : Julio Salinas
Editor : Chamot Nahac
