AUTORIDADE COVALIMA HO PARSERU DEZENVOLVIMENTU ESFORSU BUKA SOLUSAUN LORI AGRIKULTOR NIA PRODUTU ASESU BA MERKADU

Covalima (RCCT) 04-10-24-Autoridade Covalima hamotuk ho parseiru dezenvolvimentu sira sei buka solusaun ba to’os na’in sira nia produtu hanesan tomate, pateka no seluk tan hodi bele asesu ba merkadu

Sekretariu Munisipal Asuntu Sosial no Organizasaun Komunitaria Filomeno Cardoso, sei kopera Parseiru sira atu kria fatin ba Agrikultor sira hodi fa’an sira nia produtu lokal ne’ebé sira kolleta rasik husi sira nia to’os.

“Agora daudaun ita haree grupu agrikultor sira komesa produs barak ona pateka no iha parte balu sira produs mos tomate maka ita hare iha merkado butuk barak loos iha ne’eba, rezultadu kolleta husi sira nia pateka ho tomate ne’e, ita hakarak buka fatin ida para atu nune’e ita bele kria ona fatin merkadu ne’ebé di’ak, ita bele produs jus pateka, nudar Sekretariu Asuntu Sosial no Organizasaun Komunitaria ninian sei servisu hamutuk ho parte ONG sira hotu ne’ebé ejiste iha Covalima atu buka solusaun ba agrikultor sira ne’ebé maka produs ona pateka sira,” Sekretariu Munisipal Asuntu Sosial no Organizasaun Komunitaria Filomeno Cardoso, hato’o lia hirak ne’e hafoin partisipa iha serimonia lansamentu kolleta pateka no entrega makina mini tiller rua ba grupu agrikultor Fini Uman no Grupu Hadi’a Moris iha Aldeia Fau Laran, Suku Maudemu, Postu Administrativu Tilomar.

Diretors Ezekutivu Hametin Lia Tatoli(HLT), Cipriano Menezes, informa katak daudaun ne’e halo preparasaun ba grupu, ne’ebé sai sasukat ida ba futuru hodi bele ita iha menus liu grupu 50 nune’e bele halo ona prosesu ba produsaun jus husi produtu lokal sira.

“Ha’u hanoin HLT agora ba iha etapa primeiru, ne’e kria pilotu, prepasaun grupu iha nia sustentabilidade, hahu husi tinan 2023 grupu rua la’o di’ak to’o mai 2024  ba tan grupu rua di’ak ona, ida ne’e sai sasukat ida ba futuru, maibe hanesan ohin Sekretariu Asuntu Sosial no Organizasaun Komunitaria ko’alia ne’e atu governu lokal hamutuk organizasaun sira kontinua sei halo aprosimasaun ba futuru maibe grupu rua de’it ha’u hanoin sei labele, maibe pelumenus iha Munisipiu Covalima ne’e liliu ba iha rai tetuk sira ne’ebé area produsaun ba pateka ne’e kuandu grupu ne’e maizumenus 50 ba leten, kada pesoal iha grupu laran ne’e ema ida kuda pateka rai hektares ida ne’e ninia sustentabilidade ne’e ita bele preparasaun buka dalan para atu aproxima oinsa produs jus atu nune’e to’os na’in sira halo to’os karik labele baruk tanba ninia merkadu maka ne’e ona” nia dehan.

Esperansa Sekretariu Munisipal Asuntu Sosial no Organizasaun Komunitaria Filomeno Cardoso, hanesan motivasaun ba to’os na’in sira atu badinas servisu iha to’os hodi hasaun produtu lokal no bele habesik merkadoria ba komunidade.

Jornalista : Julio Salinas

Editor      : Chamot Nahac