JICA FASILITA FORMASAUN BA AUTORIDADE LOKAL IHA SUKU OGUES KONABA PROGRAMA IMPLEMENTASAUN REGULAMENTU SUKU
Fasilitator ba formasaun ne’e,
Inacçio Sequeira, relata konaba programa ne’e nia mak na'in mak Ministeriu
Agrikultura Pekuaria Peska no Floresta (MAPPF), liu husi Diresaun Nasional
Basias Hidrografika Noru, ne’ebé hetan apoiu fundus husi JICA.
"Ami servisu konsorsiu
ne’e husi ONG tolu hanesan Raebia, Atsae no Fundef ne'ebé agora daudaun servisu
hamutuk ho JICA, no programa ne’e na'in mak MAPPF, ne'ebé objetivu ohin hakarak
fo treinamentu ka fo diskusaun ba sira nia regulamentu suku atu xefe sira tun
hodi sosializa ba komunidade, objetivu ida mos atu fo hanoin ba xefe aldeia
sira oinsa maka atu tun hodi sosializa ba ita nia komunidade sira atu sira mos
bele obedese ba regulamentu ne'ebé maka iha, programa ida ne’e mos sei iha kontinuasaun no programa ne’e atu
la’o liu husi regulamentu tara bandu, depois tara bandu iha programa sira sei
tuir mai maka sei hare liu ba programa rekursu naturais, dikusaun no ohin tama
ba iha programa draft regulamentu hodi tun sosializa ona ba ita nia komunidade
sira" informa Fasilitator Inaçio Sequeira.
Xefe Suku Ogues Febriano Pereirra
Atok, dehan formasaun ida ne'e realiza husi JICA ninia parseiru ONG sira hodi fo hanoin ba lideransa lokal
sira atu sosilizasaun konaba planu utizasaun rai ba futuru iha kada aldeia.
"Formasaun ida ne'e
husi JICA apoiu husi ONG lokal tolu hanesan Raebia, Atsae no mos Fundef ba
programa implementasaun regulamentu Suku ne'ebé foka liu ba oinsa maka planu
utiliza rai ba futuru, ne'ebé durante ne'e la’o, ami iha membru hamutuk
na'in-49 durante ne’e halo formasaun tun iha terenu hodi bele halo
sosializasaun ba ita nia komunidade sira, ne'e ligadu liu ba iha asuntu tolu
hanesan relasaun ema ho ema, ligasaun ema ho natureza no mos ligasaun ema ho
balada sira, iha regulamentu ida ne'e foka liu ba oinsa maka atu eduka
komunidade sira hodi respeita liu ba ambiente" nia informa.
Atividade ne’e hala’o iha Sede
Suku Ogues, ne’ebé realiza husi Ministeriu Agrikultura Pekuaria Peska no
Floresta liu husi Diresaun Nasional Basias Hidrografika Noru. Hetan fundus husi
JICA no apoiu husi ONG Raebia, Atsae no Fundef hodi fasilita formasaun ba
lideransa komunitaria sira iha Suku Ogues. Partisipa iha formasaun ne’e mai
husi Xefe Suku Ogues, Xefe Aldeia sira, Xefe Juventude Suku Ogues inklui delega
no delegadu sira.
Jornalista : Julio Salinas
Editor : Chamot Nahac
