UNESCO REALIZA SEMINARIU BA AUTORIDADE POSTU SUAI HODI FO HANOIN ATU PROTEZE RIKU SOIN TIMOR NIAN BA MUNDU

Covalima (RCCT) 11-10-24-Organizasaun Nasoins Unidas ba Edukasaun Siénsia no Kultura (UNESCO-Sigla Inglés) realiza semanariu iha Munisipiu Covalima ba Autoridade Postu no Suku Sira iha Postu Administrativu Suai, hodi fo hanoin ba komunidade sira atu proteze Uma Lulik no Sasan Lulik sira ne’ebé partese nudar riku soin Timor nian.

Koordenador Komunikasaun no Informasaun iha UNESCO, Emeliano da Costa Silva, hatete riku soin Timor nian ida maka uma lisan, Dokumentasaun video, livru antigu ne’ebé kategoria bele haruka ba UNESCO hatama ba memoria mundu nian

“Buat seluk maka hanesan videografia ka video ne’ebé antigu no mos aplikasaun internet ne’ebé dokumentasaun antigu iha ne’e ita bele foti katak kategoria bele tama iha memoria do mundu no mos importante liu hare ba ita nia uma adat no mos sasan sira ne’ebé lulik iha uma adat laran ita bele proteze risku barak tanba durante tempu iha funu laran buat barak maka lakon ne’ebé liu husi atividade ida ne’e bele fo hanoin no verifika fila fali hodi bele rejistu iha UNESCO internasional” informa Koordenador Komunikasaun no Informasaun iha UNESCO Emeliano da Costa Silva, iha Salaun Administrasaun Postu Suai, Kinta (10/10)

Administrador Postu Administrativu (APA) Suai, Ildefonso Maria Amaral, hatete liu husi seminariu ida ne’e atu fo hanoin ba autoridade sira atu bele servisu hamutuk ho UNESCO, halo levantamentu dadus ba riku soin sira hodi bele tau iha muzeum no mos rejistu iha memoria mundial liu husi UNESCO.

“Iha komisaun nasional Timor Leste ba UNESCO ne’ebé mai kordena Autoridade Postu Suai hodi hala’o seminariu konaba oinsa atu promove no salvaguarda patrimonio dokumental hodi rejistu iha memoria do mundu ba iha autoridade lokal, tanba ne’e hanesan autoridade iha intervensaun presija servisu hamutuk ho parte relevante, hanesan iha arkivu, Museum Rejistensia, Turismu no CAVR atu nune’e aban bainrua halo levantamentu dadus iha Postu Suai, Munisipiu Covalima bele foti dadus ida ne’ebé ho loloos atu nune’e ita bele tau iha arkivu hodi rai iha ita nia museum atu nune’e jerasaun bele le hodi komprende istoria ne’e ho loloos” nia dehan.

Seminariu ida ne’e realiza husi UNESCO hafoin kordena ho autoridade nivel Postu Administrativu iha Suai, nune’e partisipa husi Administrador Postu Administrativu Suai, Ildefonso Maria Amaral, Xefe Suku, Xefe Aldeia, Dalegada no delegado husi Suku lima ne’ebé hola parte iha Postu Administrativu Suai, hanesan Suku Beko, Debos, Kamanasa, Labarai no Suai-Loro.

Jornalista : Julio Salinas

Editor      : Chamot Nahac